Polşa siyasi elitasında faciə!

Polşa prezidenti Lex Kaçinski və həyat yoldaşının olduğu Tu-154 tipli təyyarə Rusiyanın Şimali Smolensk hərbi aerodromunda qəzaya uğrayıb. Rusiya mətbuatının məlumatına görə, insident təyyarə yerə eniş edən zaman baş verib. Rusiya Fövqəladə Hallar Nazirliyinin məlumatına görə, hadisə nəticəsində 87 nəfər həlak olub və hazırda qəza yerində xilasedicilər işləyir.
"Moskva vaxtı ilə saat 10:56-da Varşavadan Smolenskə uçan Tu-154 təyyarəsi aeroporta eniş edərkən qəzaya uğrayıb. İlkin məlumatlara görə, hadisə nəticəsində 87 nəfər həlak olub", - deyə Rusiya Fövqəladə Hallar Nazirliyinin ictimaiyyətlə əlaqələr şöbəsinin rəisi İrina Andrianova məlumat verib.
Polşa Xarici İşlər Nazirliyinin məlumatına görə, prezident Lex Kaçinski və onun həyat yoldaşının taleyi naməlumdur.
İTAR-TASS isə qəzanın güclü duman səbəbindən baş verdiyi barədə məlumat yayıb.
Rusiya Federasiyası Prokurorluğu yanında İstintaq Komitəsinin rəsmi nümayəndəsi Vladimir Markinin verdiyi məlumata görə, bu gün qəzaya uğrayan və Polşa prezidenti Lex Kaçinskinin də içərisində olduğu təyyarədə 132 sərnişin olub.
"Hazırda ilkin istintaq tədbirləri aparılır. Ölənlər barədə məlumat dəqiqləşdirilir", - deyə o əlavə edib.
Xatırladaq ki, Polşa prezidenti Lex Kaçinski totalitar repressiya qurbanlarının dəfn olunduğu Rusiyada ilk beynəlxalq memorial kompleksin yerləşdiyi Katın qəbristanlığını ziyarət etməyi planlaşdırırmış. Bu barədə dünən vilayət administrasiyasından məlumat verilib. Katında baş verən faciəvi hadisələrin 70 illiyinə həsr olunmuş tədbirlərdə Polşanın "Katınskie semi" İсtimai Təşkilatının təqribən min nümayəndəsinin iştirakı nəzərdə tutulurdu. Memorial Katın meşəsində vilayət mərkəzindən 18 kilometr qərbə yerləşir.
Kremlin mətbuat xidmətindən verilən məlumata görə, Rusiya prezidenti Dmitri Medvedevin göstərişi ilə fövqəladə hallar naziri Sergey Şoyqu hadisə yerinə yollanıb. "Vesti-24” telekanalının verdiyi xəbərə görə isə, Medvedev aviaqəzanın araşdırılması üçün baş nazir Vladimir Putinin rəhbərliyi altında komissiya yaradıb.
Rusiya Fövqəladə Hallar Nazirliyindən "RİA Novosti”yə verilən məlumata görə, təyyarə qəzası nəticəsində göyərtədə olanların hamısı həlak olub. Təyyardə olanların hamısının ölməsi xəbərini Mərkəzi Federal Dairənin güc strukturlarında çalışan yüksək vəzifəli mənbə də təsdiq edib. Onun sözlərinə görə, təyyarə Moskva vaxtı ilə 10:50-də hava limanının uçuş-eniş xəttindən 500 metr kənarda yerə düşüb.
Qeyd edək ki, qəzaya uğramış təyyarədə Polşa prezidenti və xanımı ilə yanaşı, ölkənin sabiq prezidenti Rışard Kaçorovski, Milli Yaddaş İnstitutunun prezidenti Yanuş Kurtıka, Polşa ordusunun pravoslav yepiskopu və briqada generalı Miron Çodavski, general Tadeuş Ploski, Milli Bankın rəhbəri Slavomir Skşipek, sabiq müdafiə naziri və Polşa prezidentliyinə keçmiş namizəd Yeji Şmaydzinski, Prezident Katibliyinin rəhbəri Vladislav Stasyak, Baş Qərargah rəisi Frantişek Qonqor da olub.

Allah Rəhmət Eləsin!!! AMİN!!!

Mənbəə: QayNar İnfo